Membri tal-familja immedjata jistgħu wkoll ikunu involuti fil-għoti ta’ pariri matul il-proċess ta’ tranżizzjoni. Wara kollox, hija mhux biss il-persuna trans li tidħol fit-tranżizzjoni, iżda l-familja kollha. L-imsieħba jistgħu jkollhom bżonn appoġġ għall-emozzjonijiet tagħhom stess u jekk il-persuna trans ikollha t-tfal, huwa rakkomandat ħafna li tinvolvihom. Ġenituri jew gwardjani ta’ persuni trans (speċjalment żgħażagħ) jistgħu wkoll ikunu qed jistaqsu ħafna mistoqsijiet meta t-tfal tagħhom jibdew juru mġiba ta’ nuqqas ta’ konformità mal-ġeneru jew jiverbalizzaw identità tal-ġeneru differenti minn dik mistennija.

Ulied ta’ persuni trans

It-tfal faċilment iħossu li ġenitur qed jitħabat ma’ xi ħaġa. Pereżempju, iħossu tensjoni fil-familja jew jisimgħu konverżazzjoni diskreta bit-telefon, iżda ħafna drabi ma jistaqsux b’mod attiv x’inhu jiġri. Għalhekk huwa importanti li tinforma lit-tfal fiż-żmien opportun. Il-ġenituri trans spiss ifittxu l-mod u l-aħjar ħin biex jinfurmaw lil uliedhom. It-tfal jipproċessaw ukoll l-informazzjoni b’mod differenti skont l-età. Meta t-tfal ikunu infurmati x’qed jiġri lil-ġenituri tagħhom, dan jista’ jagħti lok għal ħafna mistoqsijiet. Huwa importanti ħafna li dawn jinstemgħu u jiġu mwieġba b’mod xieraq.

Ir-riċerka turi li t-tranżizzjoni ta’ ġenitur fiha nnifisha m’għandhiex konsegwenzi negattivi fuq it-tfal (Dierckx et al., 2015). Madankollu, jekk iż-żewġ ġenituri ma jkunux (għadhom) fuq l-istess paġna dwar li wieħed minnhom ikun transġeneru, it-tfal jistgħu jiġu mdaħħla f’kunflitti ta’ lealtà. Dawn it-tipi ta’ kunflitti jista’ jkollhom effett detrimentali fuq l-iżvilupp tat-tfal fil-futur.

Imsieħba

Wieħed jista’ jsir jaf li s-sieħeb tagħhom huwa trans b’modi u ħinijiet differenti matul ir-relazzjoni, pereżempju fil-bidu tar-relazzjoni jew wara numru ta’ snin. Dan it-tagħrif jista’ wkoll jiġu riċevut b’diversi modi. Għal xi msieħba jiġi bħala xokk, għal oħrajn iwassal għal sentimenti ta’ serħan. Huwa ta’ spiss perjodu ta’ żmien ikkumplikat fir-relazzjoni. Bħal f’ħafna rivelazzjonijiet kbar fir-relazzjonijiet, jekk is-sieħeb jisma’ xi ħaġa biss wara snin flimkien, huwa aktar probabbli li se tiġi bħala xokk. Xi kultant, jista’ jkun diffiċli għal sieħeb biex ikun jaf x’għandu jaħseb meta jirċievi tagħrif importanti bħal dan. F’dawn il-każijiet, li tkun sieħeb ta’ xi ħadd li jiżvela li huwa trans jista’ jkun ta’ sfida (Iżrael, 2005).

Għal oħrajn, anke wara żmien twil flimkien, ir-rivelazzjoni li s-sieħeb tagħhom huwa trans tista’ tintlaqa’ tajjeb, peress li tista’ tgħin biex tispjega xi ħaġa li ma kinux kapaċi jidentifikaw fir-relazzjoni. L-imsieħba jistgħu wkoll igawdu u jiċċelebraw din l-aħbar peress li tista’ ġġib serħan, ħelsien u kuntentizza lill-persuna trans u lilhom ukoll.

“Xi jfisser li inti transgender?” “Kemm ilek tħossok hekk?” “Għaliex ma għidtilniex qabel?” “Dawn is-sentimenti se jerġgħu jinbidlu mill-ġdid?” – huma biss ftit mill-ħafna mistoqsijiet li n-nies jistgħu jistaqsu. Meta l-persuna trans tkun ilha turi sinjali ta’ ġlieda emozzjonali għal żmien twil, jgħidu bil-miftuħ li huma trans jista’ jwassal għal sens ta’serħan jew paċi għas-sieħeb tagħhom li fl-aħħar ikollu tweġiba għal dak li kien ħażin. Ladarba tiġi diskussa, il-persuna trans tkun aktar kalma u s-sieħeb jista’ jiffoka aktar fuq l-istabbiltà emozzjonali u l-appoġġ.

Is-sieħeb ta’ persuna trans jista’ jesperjenza ħafna reazzjonijiet emozzjonali differenti:

• Nuqqas ta’ twemmin: għax ħadd qatt ma jistenna dan mingħand sieħeb li ħasbu li kienu jafu sew.
• Tħossok imqarraq: għax in-nies isaqsu għaliex ma ġewx infurmati b’dan qabel.
• Tħossok mitluf: m’hemm assolutament l-ebda kontroll fuq il-kwistjoni. “Dan kif se jevolvi?” “Għal xiex se jwassal?”
• Biża’: dan ifisser it-tmiem tar-relazzjoni?
• Mistħija: in-nies jibżgħu minn dak li se jgħid ħaddieħor dwar is-sitwazzjoni.
• Ħtija: “X’għamilt ħażin li wasal għal dan?”
• Telf tal-kunfidenza fihom infushom: m’għadnix mara/raġel biżżejjed?
• Rabja: “Għaliex ġralna hekk?”
• Konfużjoni: “Jekk inkompli f’din ir-relazzjoni din tagħmilni gay/straight?”
• Injorati: iħossu li s-sentimenti tagħhom ma jimpurtawx u ma jingħatawx biżżejjed attenzjoni, jew li t-tħassib tagħhom mhux qed jinstema’.
• Serħan: “dan iwieġeb tant mistoqsijiet li kelli”
• Ferħ: li jaraw lis-sieħeb tagħhom ibati u fl-aħħar ikunu jafu li t-tbatija tista’ tintemm, tista’ tkun esperjenza pożittiva ħafna
• Kurżità: sieħeb jista’ jkun kurjuż ħafna dwar kif inhu l-proċess tal-ħsieb jew is-sentimenti tal-persuna trans; xi drabi dan jista’ jkun diffiċli għas-sieħeb trans biex jispjega jew ipoġġi fi kliem
• Inkwiet: l-imsieħba jafu, bħal ħafna nies oħra, li tkun trans hija diffiċli u tista’ tkun perikoluża; xi msieħba se jsiru inkwetati dwar is- sikurezza tas-sieħeb trans tagħhom

L-imsieħba li jiddeċiedu li jibqgħu flimkien waqt transizzjoni kultant ikollhom jitgħallmu jgħixu b’inċertezza: bħalissa qegħdin flimkien, iżda jistgħu ma jkunux jafu x’se jġib il-futur hekk kif it-tranżizzjoni timxi ‘l quddiem. Jistgħu jħossu bħallikieku r-relazzjoni tagħhom qed tiġi ttestjata. L-imsieħba ta’ persuni trans jeħtieġu li jħossu li l-emozzjonijiet u l-pass tagħhom huma kkunsidrati u rispettati, filwaqt li tinżamm komunikazzjoni miftuħa; dawn iż-żewġ aspetti jistgħu jkollhom influwenza pożittiva fuq ir-relazzjoni. L-imsieħba ħafna drabi wkoll jissieltu mat-tikketta soċjali l-ġdida. Jistgħu jiġu sfurzati mis-soċjetà biex jiġu pperċepiti b’mod ġdid, bħala gay, lesbjani jew straight mingħajr ma jiddefinixxu lilhom infushom b’dak il-mod. Għal dawn ir-raġunijiet, huwa mħeġġeġ li l-imsieħba ta’ persuni trans jiġu offruti appoġġ ukoll, sabiex ikollhom spazju privat biex jipproċessaw is-sentimenti tagħhom dwar it-tranżizzjoni.

Xi drabi l-imsieħba jesperjenzaw emozzjonijiet negattivi tant qawwija li dan jista’ jwassal għad-deċiżjoni tagħhom li jtemmu r-relazzjoni. Jistgħu ma jkunux kapaċi jaslu biex jitilfu r-raġel jew il-mara li kienu jħobbu u/jew jistgħu jippreferu li jkollhom sieħeb romantiku u sesswali maskili jew femminili (Iżrael, 2005; White & Ettner, 2004). Appoġġ effettiv u f’waqtu għall-imsieħba jista’ jżid il-probabbiltà li l-koppja tibqa’ flimkien matul u lil hinn mit-tranżizzjoni (Dierckx et al., 2019).

Matul is-sessjonijiet tal- għoti ta’ pariri mal-imsieħba, huwa importanti li tagħraf is-sentimenti tagħhom u tħallihom jitkellmu mill-perspettiva tagħhom fit-tranżizzjoni. Matul it-tranżizzjoni, l-imsieħba ħafna drabi jieħdu r-rwol ta’ appoġġ u ta’ kura u jwarrbu s-sentimenti tagħhom stess. Il-kunflitt tar-rwoli tagħhom bejn ir-rwol ta’ sieħeb romantiku, ir-rwol ta’ ko-ġenitur u r-rwol ta’ alleat jistgħu jinfluwenzaw il-proċess ta’ aċċettazzjoni u adattament tas-sieħeb u jmexxu r-relazzjoni għal riżultati speċifiċi (Dierckx et al., 2019). Kultant iħossu li s-sieħeb tagħhom huwa appoġġjat tajjeb u mħeġġeġ biex jgħid lin-nies li hu transġeneru, filwaqt li s-sentimenti tagħhom ta’ konfużjoni, dwejjaq jew niket huma traskurati jew mhux aċċettati minn oħrajn. Minbarra t-terapija tal-koppji, terapija individwali għas-sieħeb għandha tkun disponibbli jekk ikun mixtieq.